کمشنر ملتان کی زیرِ صدارت اجلاس ، شہر میں خوبصورتی، سکیورٹی اور سہولیات بہتر بنانے کے اہم فیصلے

ملتان: کمشنر عامر کریم خاں کی سربراہی میں ڈویژنل سطح کا اہم جائزہ اجلاس منعقد ہوا، جس میں اضلاع کی خوبصورتی، الیکٹرک بسوں کے منصوبے، اور مین ہول کورز کی چوری جیسے سنگین مسائل پر مفصل گفتگو کی گئی۔

اجلاس میں فیصلہ کیا گیا کہ:

گٹروں کے غائب اور ٹوٹے ڈھکن فوری طور پر تبدیل کیے جائیں۔
ہر تحصیل میں یونین کونسل کی سطح پر مکمل سروے کر کے جامع ڈیٹا مرتب کیا جائے۔
عوامی شمولیت بڑھانے کے لیے واٹس ایپ ہاٹ لائن قائم کی جائے، جبکہ اسکول کے بچوں کو بھی رپورٹنگ کا فورم دینے کی تجویز منظور کی گئی۔
سروے رپورٹس کی تصدیق کے لیے علیحدہ ویریفکیشن ٹیمیں تشکیل دی جائیں گی۔
مین ہول کورز کی بار بار چوری روکنے کے لیے کباڑیوں کی نگرانی سخت کی جائے گی اور سخت قانون نافذ کیا جائے گا۔

کمشنر عامر کریم خاں نے اعلان کیا کہ:

ری سائیکلڈ پلاسٹک کمپوزٹ مین ہول کورز جلد ملتان میں نصب کیے جائیں گے۔
متاثرہ محلوں میں نئے کور لگانے کے بعد مقامی افراد کو ان کی حفاظت کی ذمہ داری بھی دی جائے گی۔
گٹر کور چوری کو سنگین جرم قرار دیتے ہوئے مجرمان اور چوری کا سامان خریدنے والوں دونوں کے خلاف قانونی کارروائی کی سفارش کی گئی۔

مزید برآں، اگلے دو ہفتوں میں مکمل سروے اور مسنگ کورز کی فہرست پیش کرنے کا ٹاسک جاری کیا گیا۔

کمشنر عامر کریم خاں نے ہدایت کی:

ون ڈِش کی خلاف ورزی کرنے والوں کے خلاف بلا امتیاز سخت کارروائی کی جائے۔
اسکولوں میں بنیادی سہولیات کی فراہمی اور معیار پر سختی سے عملدرآمد یقینی بنایا جائے۔
تعمیراتی منصوبوں میں معیار پر کسی قسم کا سمجھوتہ ناقابلِ قبول ہے۔

اجلاس میں نواز شریف اسکول آف ایکسیلنس اور دیگر تعلیمی منصوبوں کی پیش رفت پر بریفنگ دی گئی۔

فیلڈ سطح پر معیار کی جانچ یقینی بنانے کے لیے ہر تحصیل میں سب انجینئرز اور انسپکشن ٹیمیں بنانے کا فیصلہ بھی کیا گیا۔

کمشنر نے محکمہ تعلیم کو ہدایت کی کہ اسکولوں کے لیے فراہم کیے گئے بجٹ سے تمام ناپید سہولیات فوری طور پر مکمل کی جائیں۔

اجلاس میں ڈپٹی کمشنرز سمیت متعلقہ محکموں کے افسران شریک تھے۔