خطے کے 48 فیصد غریب پاکستان میں، یومیہ آمدنی 850 روپے سے کم: ورلڈ بینک

اسلام آباد / ملتان (ساؤتھ ٹوڈے) ورلڈ بینک نے ایک چونکا دینے والی رپورٹ جاری کی ہے جس میں انکشاف کیا گیا ہے کہ جنوبی ایشیا کے مجموعی غریب آبادی میں سے 48 فیصد کا تعلق پاکستان سے ہے۔ رپورٹ کے مطابق پاکستان میں لاکھوں افراد ایسے ہیں جن کی یومیہ آمدنی 850 روپے سے بھی کم ہے، جو انہیں انتہائی غربت کی لکیر سے نیچے دھکیل دیتی ہے۔

ورلڈ بینک کی اس رپورٹ نے نہ صرف پاکستان بلکہ پورے خطے میں غربت کے بڑھتے ہوئے بحران کو اجاگر کیا ہے۔ ماہرین کا کہنا ہے کہ جنوبی پنجاب سمیت ملک کے پسماندہ علاقے اس صورتحال سے سب سے زیادہ متاثر ہیں، جہاں بے روزگاری، مہنگائی اور سماجی محرومی کے باعث غربت کی شرح خطرناک حد تک بڑھ چکی ہے۔

رپورٹ میں یہ بھی واضح کیا گیا ہے کہ اگر فوری اور مؤثر اقدامات نہ اٹھائے گئے تو آنے والے برسوں میں یہ اعداد و شمار مزید ابتر ہو سکتے ہیں۔ حکومتی سطح پر غربت کے خاتمے کے دعوے اور زمینی حقائق میں واضح تضاد دیکھا جا رہا ہے، جو عوام اور ماہرین دونوں کے لیے تشویش کا باعث ہے۔

#ورلڈبینک #غربت #پاکستان #جنوبیپنجاب #مہنگائی