پاکستان ہاکی ٹیم سیمی فائنل میں پہنچ چکی ہے۔ یہ کسی معجزے سے کم نہیں۔ ایک ایسی ٹیم جس نے پورے سال (ماسوائے ٹورنامنٹ سے دو ہفتے قبل) نہ کوئی تربیتی کیمپ لگایا، نہ ہی کسی بڑی ٹیم سے کوئی دوستانہ یا تیاری کا میچ کھیلا، وہ آج دنیا کی بہترین ٹیموں کے خلاف سینہ تان کر میدان میں موجود ہے۔ اور یہی نہیں، ہم نے ان سے سیمی فائنل اور فائنل جیتنے کی توقعات بھی باندھ رکھی ہیں۔

ٹورنامنٹ کے آغاز سے قبل یہ طے تھا کہ پاکستان اسپورٹس بورڈ، ہاکی فیڈریشن کو ملائشیا ٹور کیلئے مالی معاونت فراہم کرے گا۔ مگر روانگی سے صرف چند دن پہلے حسبِ روایت بورڈ نے فنڈز جاری کرنے سے انکار کر دیا۔ اس کی وجہ یہ بتائی گئی کہ ملائشیا نے سابقہ واجبات کی ادائیگی کا بھی مطالبہ کیا تھا، جو 2023 میں ادا نہیں کیے جا سکے تھے۔ فیڈریشن نے واضح کیا کہ یہ ادائیگی اسٹیٹ بینک آف پاکستان کے ذریعے کی جائے گی، لیکن بورڈ نے اس وضاحت کو یوں لیا کہ جیسے فیڈریشن کے پاس خود وسائل موجود ہیں اور یوں فنڈز روک دیے گئے۔

فیڈریشن کے پاس جو تھوڑی بہت رقم موجود تھی، وہ کھلاڑیوں کے ڈیلی الاؤنس اور دیگر بنیادی سہولتوں کے لیے مختص تھی۔ اگر وہ رقم بھی اخراجات میں صرف ہو جاتی، تو ٹیم کا بیرونِ ملک سفر ہی ممکن نہ ہوتا۔ اس نازک مرحلے پر ایک مشکل فیصلہ کیا گیا۔ کھلاڑیوں کو اعتماد میں لیا گیا، انہیں پوری صورتحال سے آگاہ کیا گیا۔ سب نے مل کر یہ طے کیا کہ پہلے ٹیم کو روانہ کیا جائے، باقی معاملات بعد میں دیکھے جائیں گے۔ الاؤنس بعد میں بھی دیا جا سکتا ہے، لیکن پاکستان کے جھنڈے کو عالمی میدان میں لہرانا ضروری ہے۔