دنیا نے دیکھا دشمن چند گھنٹوں میں گھٹنے ٹیکنے پر مجبور ہوا،یومِ تشکر پر وزیراعظم کا پیغام
اسلام آباد : آپریشن بنیان مرصوص کی شاندار کامیابی پر یومِ تشکر کے موقع پر وزیراعظم شہباز شریف اور صدر آصف علی زرداری نے قوم سے اپنے جذباتی اور حوصلہ افزا پیغامات میں مسلح افواج کو خراجِ تحسین پیش کیا اور دشمن کو دیے گئے دندان شکن جواب کو عسکری تاریخ کا سنہرا باب قرار دیا۔
وزیراعظم شہباز شریف کا پیغام: "چند گھنٹوں میں کئی گنا بڑے دشمن کو جھکا دیا”
وزیراعظم نے کہا:
"دنیا نے دیکھا کہ کئی گنا بڑے دشمن کو گھٹنے ٹیکنے پر مجبور کرنے میں ہماری بہادر افواج کو صرف چند گھنٹے لگے۔”
انہوں نے انکشاف کیا کہ 6 اور 7 مئی کی درمیانی شب بھارت نے حملہ کیا جس میں معصوم پاکستانی شہید ہوئے، لیکن پاکستانی شاہینوں نے دشمن پر کاری ضربیں لگا کر بھارت کے رافیل طیاروں کو راکھ میں بدل دیا۔
وزیراعظم نے کہا:
"یہ ہمارا دندان شکن جواب تھا، جس نے عسکری تاریخ میں نیا باب رقم کیا۔ دشمن کے فوجی اڈے، اسلحے کے ذخائر اور ائیر بیسز دیکھتے ہی دیکھتے کھنڈرات میں بدل گئے۔”
انہوں نے مزید کہا کہ پوری قوم سیسہ پلائی دیوار کی طرح اپنی افواج کے ساتھ کھڑی ہے اور یہی اتحاد پاکستان کی اصل قوت ہے۔
آپریشن بنیان مرصوص کی تاریخی فتح پر یوم تشکر، قوم کا افواجِ پاکستان کو خراج تحسین
صدر آصف علی زرداری کا پیغام: "یہ کامیابی پوری قوم کی کامیابی ہے”
صدرِ مملکت آصف علی زرداری نے آپریشن کی کامیابی پر کہا:
"میں مسلح افواج کے دلیر سپاہیوں اور قیادت کو خراج تحسین پیش کرتا ہوں۔ یہ کامیابی صرف افواج کی نہیں بلکہ پوری قوم کی ہے۔”
انہوں نے کہا کہ قوم نے دشمن کی جارحیت کے خلاف بنیان مرصوص کی مانند اتحاد کا مظاہرہ کیا، اور دنیا نے پاکستان کی پیشہ ورانہ مہارت اور صبر و تحمل کو تسلیم کیا۔
صدر زرداری نے اپنے خطاب میں بھارت کے متنازعہ اقدام — سندھ طاس معاہدے کی یکطرفہ معطلی — کو سختی سے مسترد کرتے ہوئے کہا:
"معاہدے میں یکطرفہ معطلی کی کوئی شق نہیں۔ پاکستان اپنے آبی حقوق کے تحفظ کے لیے قومی طاقت کے تمام ذرائع استعمال کرے گا۔”
انہوں نے وطن کے ان شہداء کو سلام پیش کیا جنہوں نے اپنی جانوں کا نذرانہ دے کر ملک کا دفاع کیا، اور کہا کہ:
"بطور صدر میں اعادہ کرتا ہوں کہ ہم ہمیشہ اپنی افواج کے شانہ بشانہ رہیں گے۔”
قومی قیادت کا واضح پیغام: پاکستان پُرامن ہے، مگر دفاع میں کوئی سمجھوتہ نہیں
یومِ تشکر پر اعلیٰ ترین ریاستی قیادت کا قوم کے نام پیغام واضح کرتا ہے کہ پاکستان پرامن بقائے باہمی پر یقین رکھتا ہے، لیکن خودمختاری، سلامتی اور آبی حقوق پر کسی قسم کی جارحیت برداشت نہیں کی جائے گی۔
افواجِ پاکستان کے ساتھ پوری قوم کا اتحاد، قومی عزم اور فوری جوابی کارروائی نے دشمن کو حیران کر دیا، اور دنیا کو یہ پیغام دیا کہ پاکستان دفاع کے لیے ہر وقت تیار ہے۔
