پاکستان اور افغانستان کے درمیان کشیدگی ایک نئے فوجی تصادم کے دہانے پر پہنچ چکی ، امریکی میڈیا
امریکی اخبار واشنگٹن پوسٹ کی تازہ رپورٹ میں انکشاف کیا گیا ہے کہ پاکستان اور افغانستان کے تعلقات خطرناک حد تک کشیدہ ہو چکے ہیں اور دونوں ممالک ایک نئے مسلح تصادم کی طرف تیزی سے بڑھ رہے ہیں۔
رپورٹ کے مطابق، بھارت کی طرف سے طالبان حکومت کے ساتھ بڑھتے ہوئے سفارتی، سیاسی اور خفیہ رابطوں نے اسلام آباد اور کابل کے درمیان پہلے سے موجود خلیج کو مزید گہرا کر دیا ہے۔ امریکی میڈیا کا کہنا ہے کہ یوکرین تنازع اور افریقی بحران کے سائے میں یہ جنوب ایشیائی کشیدگی عالمی توجہ سے نسبتاً دور رہی، مگر اب یہ خطے کی سلامتی کے لیے سنگین خطرہ بن چکی ہے۔
تجزیہ کاروں کا ماننا ہے کہ دونوں پڑوسی ممالک ایک نئی سرحدی جنگ کے متحمل نہیں ہو سکتے، لیکن موجودہ رفتار اسی طرف اشارہ کر رہی ہے۔ اس تلخ صورتحال کی تازہ ترین مثال منگل کو مشرقی افغانستان (خوست صوبہ) میں ہونے والا وہ فضائی حملہ ہے جس میں نو معصوم بچوں سمیت متعدد شہری جان کی بازی ہار گئے۔ سوگ منانے والے اہل خانہ اپنے پیاروں کی قبروں پر مٹی ڈالتے، روتے بلکتے نظر آئے، جو اس بڑھتی ہوئی نفرت کی علامت بن گیا۔
خطے کی بدلتی جیو پولیٹیکل حرکیات نے نہ صرف ڈیورنڈ لائن کی سکیورٹی کو ناقابلِ برداشت حد تک پیچیدہ بنا دیا ہے بلکہ بھارت، پاکستان اور افغانستان کے درمیان اثر و رسوخ کی ایک نئی، خاموش مگر شدید جنگ کو بھی جنم دے دیا ہے جو کسی بھی لمحے کھل کر سامنے آ سکتی ہے۔
