واٹس ایپ اسٹیٹس میں تین شاندار نئے فیچرز،آپ بھی جانیں

کیلیفورنیا — مقبول میسجنگ ایپ واٹس ایپ نے صارفین کے اسٹیٹس تجربے کو مزید دلکش اور انٹرایکٹو بنانے کے لیے تین نئے فیچرز متعارف کرا دیے ہیں جنہیں مرحلہ وار دنیا بھر میں متعارف کرایا جا رہا ہے۔

اسٹیٹس، جسے سوشل میڈیا کی دنیا میں "اسٹوریز” کے نام سے جانا جاتا ہے، واٹس ایپ کا وہ فیچر ہے جس کے ذریعے صارفین اپنی روزمرہ زندگی کے لمحات 24 گھنٹوں کے لیے دوستوں سے شیئر کرتے ہیں۔ اب اس فیچر میں نئی جدت شامل کی جا رہی ہے۔

1. اسٹیٹس میں میوزک کلپس کا اضافہ

واٹس ایپ کے نئے فیچر کے تحت اب صارفین اپنے اسٹیٹس میں 15 سے 60 سیکنڈ کے میوزک کلپس شامل کر سکیں گے۔ یہ گانے واٹس ایپ کی میوزک لائبریری سے منتخب کیے جا سکیں گے۔
خصوصی بات یہ ہے کہ صارف صرف ایک گانا بھی بطور مکمل اسٹیٹس پوسٹ کر سکتا ہے، جبکہ میوزک کو اسٹیکر کی شکل دے کر اسے اسٹیٹس پر مزید جاندار بنایا جا سکے گا۔

2. کولاج اور لے آؤٹ آپشن

نئے "Layout” فیچر کے تحت صارفین 6 تصاویر کو مختلف انداز میں ایک کولاج میں ترتیب دے کر شیئر کر سکیں گے۔
یہ آپشن خاص طور پر ان صارفین کے لیے مفید ہوگا جو ایک ہی وقت میں متعدد تصاویر اسٹائلش انداز میں پوسٹ کرنا چاہتے ہیں۔

3. ایڈ یورز اسٹیکرز: دوستوں کا بصری ردعمل

واٹس ایپ نے ایک نیا اسٹیکر فیچر "Add Yours” بھی متعارف کرایا ہے، جس کے ذریعے دوست یا اہل خانہ آپ کے اسٹیٹس پر اپنی تصاویر یا ردعمل کا اظہار بصری اسٹیکرز کی صورت میں کر سکیں گے۔
یہ اسٹیکرز حسب ضرورت سائز اور ڈیزائن کے لحاظ سے کسٹمائز کیے جا سکتے ہیں، جس سے بات چیت مزید دلچسپ اور جاندار ہو جائے گی۔

تازہ ترین اپ ڈیٹس، عالمی سطح پر رول آؤٹ جاری

میٹا کے مطابق ان نئے فیچرز کو مارچ 2025 سے بتدریج عالمی صارفین کے لیے دستیاب کر دیا جائے گا۔ فیچرز کے مکمل رول آؤٹ میں چند ہفتے لگ سکتے ہیں، تاہم بیٹا صارفین کے لیے یہ فیچرز پہلے ہی فعال کیے جا چکے ہیں۔