پولیس حراست میں بانی پی ٹی آئی کی تینوں بہنوں کا دھرنا
راولپنڈی میں پولیس حراست میں موجود بانی پی ٹی آئی کی تینوں بہنوں نے اڈیالہ روڈ پر واقع ایک شادی ہال کے باہر دھرنا دے دیا۔
پی ٹی آئی کے کارکنان شادی ہال کے باہر جمع ہونا شروع ہوگئے ہیں اور نعرے بازی کر رہے ہیں۔ پولیس نے شادی ہال کا مرکزی دروازہ بند کر دیا ہے تاکہ مزید لوگ اندر نہ آ سکیں۔ کارکنوں کا مطالبہ ہے کہ تینوں بہنوں، بشمول علیمہ خان، کو فوراً رہا کیا جائے۔ اس دوران پی ٹی آئی کی قیادت موجود نہیں تھی۔
ذرائع کے مطابق راولپنڈی پولیس نے تینوں بہنوں کو گھر واپس جانے کی پیشکش کی، لیکن انہوں نے انکار کر دیا۔ پولیس نے انہیں اڈیالہ جیل کے باہر سے حراست میں لیا اور بعد میں ان کی گاڑی روک کر کہا کہ انہیں تھانے نہیں لے جانا بلکہ اپنے گھر واپس جانے دیا جائے۔ تاہم، بہنوں اور عالیہ حمزہ نے اس پیشکش کو مسترد کرتے ہوئے پولیس سے درخواست کی کہ چونکہ انہیں حراست میں لیا گیا ہے، انہیں تھانے لے جایا جائے۔
یہ بھی پڑھیں: عدالت کا بانی پی ٹی آئی کو کتابیں فراہم کرنے اور بیٹوں سے بات کرانے کا حکم
پولیس نے ان خواتین کو پھر ایک نجی شادی ہال منتقل کر دیا جہاں وہ وین سے باہر اتر کر ہال کے لان میں بیٹھ گئیں۔ پولیس افسران بھی ان کے ساتھ بیٹھ گئے۔ شادی ہال کا مرکزی گیٹ بند کر دیا گیا ہے اور عام افراد کو داخلے سے روک دیا گیا ہے۔
اس سے قبل پولیس نے بانی پی ٹی آئی کی تینوں بہنوں کے ساتھ دیگر رہنماؤں جیسے کہ صاحبزادہ حامد رضا، عالیہ حمزہ، نادیہ خٹک اور بانی چیئرمین کے کزن قاسم خان کو بھی حراست میں لیا تھا۔
