اوپنر صائم ایوب چھ ہفتے کے لیے کرکٹ سے باہر ہوگئے
پاکستان کے اوپننگ بلے باز صائم ایوب دائیں ٹخنے میں فریکچر کے باعث چھ ہفتے کے لیے کرکٹ سے باہر ہو گئے ہیں۔ یہ انجری انہیں جنوبی افریقہ کے خلاف دوسرے ٹیسٹ میچ کے دوران فیلڈنگ کرتے ہوئے پیش آئی۔
صائم ایوب کو جمعہ کے روز میچ کے پہلے دن زخمی ہونے کے بعد فوری طور پر اسکین کے لیے لے جایا گیا، جہاں ایم آر آئی اسکین نے ٹخنے میں فریکچر کی تصدیق کی۔ علاج کے طور پر ان کے ٹخنے کو میڈیکل مون بوٹ کے ذریعے فکس کیا گیا ہے۔
صائم ایوب نہ صرف موجودہ ٹیسٹ میچ سے باہر ہو گئے ہیں بلکہ چھ ہفتوں تک کسی بھی کرکٹ سرگرمی میں حصہ نہیں لے سکیں گے۔ تاہم، وہ ٹیم کے ساتھ جنوبی افریقہ میں موجود رہیں گے اور سیریز کے اختتام پر پاکستان ٹیم کے ساتھ وطن واپس آئیں گے۔
یہ انجری پاکستان کی ٹیم کے لیے ایک بڑا دھچکا ہے، کیونکہ صائم ایوب نے حالیہ میچز میں شاندار کارکردگی کا مظاہرہ کیا تھا۔ مداح ان کی جلد صحتیابی کے لیے دعاگو ہیں۔
